ONG Luta Hamutuk Kestiaona “Klarifika Aumenta OJE Ba Rehabilitasaun Estrada Maubara-Loes”

Jornal Timor Post - Tersa-Feira, 12 Fevereiru 2013 

NG Luta Hamutuk (LH) husu ba Governu, liuliu Ministeriu obras publiku (MOP) atu klarifika aumenta orsamentu foun hamutuk U$7.500 miloens iha 2013 ba projeitu reabilitasaun maubara-Loes 13 KM.


Tanba tuir LH nia haree iha tinan 2012, projeitu ne’e governu aloka na orsamentu hamutuk millaun U$3,659.10. hanesan projeitu estrada nasional hotu-hotu ne’ebe aprova ba 13 Distritu tinan 2012, maske ninia implementasaun kontinua ba tinan 2013 maibe laiha aumentu ba orsamentu.


“Projeitu rehabilitasaun Estrada Maubara-Loes iha tinan 2012 governu aloka ona orsamentu millaun U$3,659.10, agora projeitu lao la hun la dikin, agora iha orsamentu tinan 2013 MOP preve tan osan,” lamenta Diretur ezekutivu LH, Mericio Akara, ba Jornalista (11/2), iha Dili.


Aleinde ne’e, Mericio hatutan, tuir Proposta Governu katak sei aloka tan dotasaun foun iha tinan 2013 ba item projeitu maka hanesan Manutensaun periodika estradas hamutuk millaun U$5.000, ba orsamentu ne’e, LH husu ba MOP atu halo reviw ba kualidade kompania ne’ebe mak durante ne’e hetan kontratu ba projeitu halo manutensaun estrada.


“Nune’e orsamentu ne’e bele fo benefisiu ba povu no tenki iha kualidade projeitu ba loron praju, tanba realidade hatudu katak, manutensaun Estrada iha kapital Dili ne’ebe implementa husi kompania Estrada Boot seidauk to’o tinan ida maibe komesa at fila fali kuaze 70%,” hateten Akara.