ONG Luta Hamutuk (LH) lakonkorda planu sosa kareta foun ba membru Parlamentu foun

Jornal Timor Post - Tersa-Feira, 24 Jullu 2012

(Timor Hau nia doben)

ONG Luta Hamutuk (LH) lakonkorda planu sosa kareta foun ba membru Parlamentu foun, tanba kondisaun kareta ne’ebe deputadu tuan sira uza sei diak no bele uza hela ba halo serviso.

Tuir Diretur LH, Mericio Akara katak kareta pazero ne’ebe membru Parlamentu tuan sira uza, foin maka tinan lima no nia kondisaun sei diak, tanba sa mak tenki hasai tan osan 2 Miloens hodi sosa tan kareta foun.

“Ami la konkorda tamba kareta sira ne’e sei diak, nusa mak la mantein buat ne’ebe maka iha? Ami laos la hataan PN labele iha kareta, maibe enkuantu kada tinan lima ita sosa kareta foun ne’e, ita gasta osan povu nia arbiru de’it,” nia tenik ba Timor Post iha nia knar fatin, Farol (23/7).

Nia mos hatutan tan,” kareta ida nia folin bele fo bolsu estudu ba ema kiak nain rua nolu para ba eskola iha Universidade, iha rai laran no rai liur, agora imazina took, kareta 65, ne’e osan hira ona? Nusa la fo bolsu estudu ba ema kiak nia oan sira hodi ba estuda,” dehan Akara.

Akara mos hateten, kareta Pazero ne’ebe deputadu sira uza ne’e, kuandu sira kuidadu didiak minim liu bele uza tinan 10.

Nune’e mos, LH Mos lakonkorda ho planu Governu halo lelaun ba kareta tuan, tanba, ne’e hanesan manobra ida atu fahe kareta ba malu, tanba iha lelaun ne’e membru parlamentu tuan sira mak sei iha prioridade.

“Ami lakonkorda planu halo lelaun ne’e, tanba orsida membru parlamentu Nasional tuan sira mak sei hetan fali, tamba prioridade fob a sira, ida ne’e ita konsidera fahe kareta ba malu, Politika Parlamentu anterior nia mos la dun diak, sira halo finzi dudu prosesu ne’e para halo planu hola kareta foun para sira mak hetan asesu ba kareta tuan,” Akara esklarese.