GOVERNU FOIN EZEKUTA 13.5% HUSI OGE 2012

Kablakihun-TP 28/03/2012

Wn

Tuir Rezultadu Monitorizasaun ONG Luta Hamutuk (LH) ba Orsamentu 2012, katak Governu Foin Ezekuta 13.5%.

Husi ami nia monitorizasaun ba orsamentu 2012, hahu fulan Janeiru to’o Marsu, governu foin ezekuta 13.5%, husi orsamentu 2012 ho montante billiaun $1.6, informa Direktur Ezekutivu Luta Hamutuk (LH) Merecio Akara iha konferensia Imprensa tersa (27/03) iha Farol Dili.

Tuir nia, ba orsamentu tinan 2012 governu halo planu no programa prioridade ba area hitu, hanesan infrastruktura baziku,dezenvolvimentu Rural,dezenvolvimentu rekursu Humanu,Asesu Justisa inklui buat seluk tan, maibe tanba membrus governu preokupa ho aktividade kampanha ba Presidensia, agora tama segundu ronde no sei iha elisaun Parlamentar ifa ne’e deficil atu governu ezekuta orsamentu hotu.

Tan ne’e, Luta Hamutuk fiar katak Abril to’o Dezembru (fim do ano) governu sei la konsege ezekuta orsamentu hotu diak, tanba membrus ho governu rasik sei infrenta hela aktividade Prezidensial no Legislativa nebe sei prejudika kualidade ezekusaun orsamentu 2012.

Nia haktuir, relasiona ho agenda politika ba festa demokrasia ba elisaun Prezidensial no Parlamentar, LH preokupa tebes ho kualidade ezekusaun orsamentu jeral do estadu ba ano fiscal 2012.

Ami preokupa tebes ho kapasidade governu atu ezekusaun orsamentu jeral ano lektivu 2012. Entertantu Deputadu Bankada Fretilin Inacio Moreira, reforsa katak, sei liu ona trimestral maka governu AMP foin ezekuta orsamentu 2012 atinji 13.5% entaun governu AMP mak tenki responsablidade.

Se ida ne’e akontense, ami sei husu governu AMP lidera husi Primeiru Ministru Xanana Gusmao tenki mai esplika iha Parlamentu Nasional(PN) sa tan elisaun Prezidensial no Parlamentar hau fiar katak sira sei la ezekuta hotu.