Inkontru Trimestral Focal Point Luta Hamutuk tinan 2011 ba dala II

KABLAKIHUN (27/072011) 

Directur Luta Hamutuk "Mericio AKARA" hateten iha loron 29/07/2011 Luta Hamutuk sei realiza aktividades  "Inkontru trimestral Fokal Point Luta Hamutuk, Inkontru ne'e halao iha DILI"   Aktividades ne'e nudar aktividaes importante ida nebe mak instituto Luta Hamutuk iha. Planu hodi iha Fokal Point iha kada Suku iha teritoriu tomak ne'e refeba iha misaun husi Luta Hamutuk nian mak hanesan: Oinsa rekruta Focal Point iha kada Suku iha teritoriu Timor Leste laran tomak. Atu rekruta Focal Point ne’e Luta Hamutuk iha prosesu ida mak presiza kandidatu ba Fokal Point sira tenke liu mak hanesan: 

Premeiru: Luta Hamutuk hala'o aktividade briefing iha nivel suco. Aktividade ida ne’e hanesan diskusaun ho komunidade iha nivel suco kona ba asuntu Fundu Petroliferu nomos Orsamentu Geral do Estadu.  Hafoin aktividade hirak ne'e Luta Hamutuk identifika komunidade balu nebe bele sai hanesan kandidatu ba Focal Point iha suco refere. Iha community briefing ida ne’e mos hanesan aktividade ida nebe atu fo informasaun baziku ba komunidade no Focal Point sira.

Segundo : Hafoin aktividade briefing Luta Hamutuk kontinua fo kapasitasaun ba kandidatu Focal Point sira liu husi treinamentu ida mak hanaran "Treinamentu Klase ba Fokal Point", iha ne'e sei treina Kandidatu Fokal Point Sira ho spesifiku/klean liu ba asuntu oinsa atu hatene no tau matan ba Fundu Petroliferu no Orsamentu Geral do Estadu atu nune'e kandidatu Focal Point sira bele iha kapasidade hodi nune'e bele kontrola prosesu Orsamentu nebe mak tama to'o sira nia Suku. Bainhira Kandidatu Fokal Point sira tuir "Treinamentu Klase" ne’e kandidatu Focal Point sira ne'e mos tuir tan workshop kona ba advokasia nian. Fase hirak ne'e mak hanesan prosesu kapasitasaun ba Focal Point sira mak respresenta komunidade sira iha ida-idak nia Suku. Kunado kandidatu Focal Point hirak nee liu ona husi fase hirak ne’e, foin kandidatura Fokal Point sira sai ona Focal Point no representante Luta Hamutuk iha sira nia suco. 

Papel husi Focal Point hirak ne’e sai  "mata dalan ba sira nia komunidade iha sira nia suco, atu nune sira bele halo kontrolo ba prosesu dezenvolvimentu nasional". hahu husi tinan 2005 Insitutusaun Luta Hamutuk hari’i, iha ona Focal Point hamutuk nain 112 iha distrito 12 hanesan Distrito Lautem, Baucau, Viqueque, Manatuto, Dili, Aileu, Manufahi, Ermera, no Liquisa, Oequssi, Same/Manufahi Ainaro no Covalima. Iha tinan 2010 Luta Hamutuk kontinua iha distrito tolu hanesan iha distrito Ainaro, Oekussi no Suai, ho fulan 6 premeiru konsege halo ona community briefing iha distrito Ainaro no distrito Oekussi nomos iha fulan 6 segundo iha distrito Covalima.


Tuir programa Inkontru trimestral Fokal Point Luta Hamutuk ba dala II ne'e sei halao iha: loron Sexta-Feira 29/07/2011, inkotru ne'e sei hala'o iha Dili . Objektivu  husi Inkontru trimestral ne'e nudar fase Konsolida Focal Point sira hodi update informasaun Entre Fokal Point husi kada distritu hamutuk Ho Instituto Luta Hamutuk, update mos aktividades  mak Fokal Point kada Distritu halo ona, hodi hato'o mos planu monitorisazaun nebe mak Fokal Point sira halo ona iha sira nia Suku/distritu, ba ikus hodi halo evaluasaun ba sira nia aktividade kada fulan tolu ba sira nia knar hanesan focal point Luta Hamutuk.
Materia Inkontru


Partisipante iha inkontru ne'e mai husi Focal Point Luta Hamutk mai husi distritu 3 hanesan Distrito AILEU, LIQUISA no Distritu ERMERA nebe hamutuk ema nain 45.