 |
| Directur LUTA HAMUTUK instritute, partisipa iha Trainamentu ba Fokal Point Luta Hamutuk nian, iha DARE foin lalais ne'e. |
Aprovisionamentu hanesan parte ida importante iha ezekusaun Orsamentu Geral do Estado nebe iha funsaun atu estabelese mata dalan ba individu ka kompania nebe simu knar hodi buka ka aranja eqipamentus no bens e servisu nebe presiza iha implementasaun projetu. Mata dalan, mekanismu no prosesu aprovisionamentu ida mak propriadu no adekuadu presiza hodi bele hatudu transparensia no bele hetan kompetisaun nebe diak nune bele atinji objetivu efisiensia, prevene fraud nomos korupsaun iha aktividades aprovisionamentu nia laran.
Atu garante transparensia ida ne’e presiza iha papel ba sociadade sivil hodi tau matan ba iha implementasaun mata dalan aprovisionamentu nomos mekanismu hirak nebe estabelese tiha ona tuir lei. Luta Hamutuk hanesan sosieadade sivil nebe iha liña primeiru ba asuntu transparensia iha Timor Leste iha komitmentu maka’as atu loke espasu ba papel tau matan iha aktividades aprovisionamentu estadu nian liu husi Orsamento Geral do Estado.
Ho hanoin hirak ne’e Luta Hamutuk nebe durante ne’e halo monitoramentu, Peskiza no advokasia ba orsamentu geral do estado hanoin katak, atu halo advokasia nebe mak sei forte liu presiza involvimento komunidade hanesan autor hodi halo advokasia tamba komunidade hanesan benefisiariu ba dezenvolvimentu. Atu realiza hanoin hirak ne’e Luta Hamutuk fo tan espasu ida ba oin ho halao workshop aprovisionamentu ba focal point no membru Luta Hamutuk iha dia 5 – 6 de Novembro 2010.
Objetivu husi workshop ida ne’e atu fo kuñesimentu forte konaba prosesu aprovsionamentu ba Focal Point no membru Luta Hamutuk liu husi fahe esperensia nune bele hetan kapasidade sufisiente hodi desenvolve aprosimasaun apropriadu wainhira halao monitorizasaun ba aktividades aprovisionamentu publiku.
PROSESU IMPLEMENTASAUN WORKSHOP
Iha data dia 6 de Novembro 2010, Intitusaun Luta Hamutuk realiza workshop prosesu aprivisionamentu publiku. Workshop ne’e halao iha Salao inkontru St. Ignatio DARE - Dili. Partisipantes hamutuk 35 pesoas nebe kompostu husi Focal Point aktivu Luta Hamutuk iha distritu Dili, Viqueque, Aileu, Oequse, Ainaro no Liquisa inklui membru Luta Hamutuk.
Fasilitador ba workshop ida ne’e mai husi Komisaun Europeia, Senhor John Blunt- Espesialista Aprovisionamentu publiku nomos husi Ministeriu Finansas RDTL nebe representa husi Direitor Aprovisionamentu ho nia ekipa hamutuk ema nain hat.
Fasilitador husi Komisaun Europeia apresenta sistema no mekanismu aprovisionamentu in jeral no apresenta decretu Lei Aprovisionamentu iha Timor Leste. Senhor John Blunt apresenta mos konaba realidade implementasaun aprovisionamentu iha Timor Leste. Senhor John identifika katak kuaze 70% Orsamentu Geral do Estado liu husi prosesu aprovisionamentu nune presiza duni tau atensaun hodi halo monitoramentu husi Sosieadade Sivil, hanesan Luta Hamutuk iha mos papel importante atu hare’e tuir lalaok aprovisinamento iha Timor Leste. Iha mos sesaun diskusaun no partisipantes sira aktivu no husu Senhor John nia pontu de vista konaba aprovisionamentu no mos oinsa bele hadia diak liu tan aprovisionamentu iha Timor Leste.
Fasilitador husi Ministeriu Financas nebe representa husi Direitor Aprovisionamentu ho nia ekipa apresenta istoria ezekusaun Orsamentu Geral do Estado komesa husi tinan 2006 to’o 2010, mudansa rejime legal tinan 2010, funsaun geral aprovisionamentu, Estrutura Organiku Dirasaun Aprovisionamentu no mos Orsamentu Geral do Estado 2010. Iha nia esplikasaun pontus lubuk tekniku ba aprovisionamento iha Ministério Finansas, nune loke liu tan Luta Hamutuk nia perspektivas sobre servisu tekniku nian, husi prosesu publikasaun tender, dokumentus tender, seleksaun proposta husi kontrator sira, pagamento projeto, implementasaun projeto nomos monitorizasaun e evaluasaun nian.
PONTUS SENTRAL IMPORTANTE MAK KONSEGE IDENTIFIKA
1. Atu hetan kualidade aprovisionamentu prezisa iha kompitisaun ba buat 3 (tolu) mak hanesan: espesifikasaun servisu/ekipamentus, tempu entrega servisu/ekipamentus no folin nebe diak ba servisu/ekipamentus;
2. Single Source hanesan tekniku aprovisionamentu ida mak uza ba iha situasaun emerjensia maibe rekonyese katak iha risku ba efisiensia, prevene fraud, no mos korupsaun;
3. Aprovisionamentu hanesan parte ida importante iha Ezekusaun Orsamentu Geral do Estado nune perzisa hametin Instituisaun no kapasitasaun staff nebe implementa ka halao prosesu aprovisionamentu;
4. Kuaze 70% Orsamentu Geral do Estado liu husi prosesu aprovisionamentu nian;
5. Ezekusaun Orsamentu Geral do Estado komesa tinan 2006 to’o 2009 hatudu progresu diak maibe iha tinan 2010 ate 3 de Novembro 2010 foin mak atinji 50% in cash;
6. Preokupasaun husi partisipantes konaba existensia Sekretariu Teknik Aprovisionamentu nebe iha knar halo monitorizasaun hafoin Vice Primeiru Ministro asuntu Boa Governasaun resigna a’an;
7. Pontu de vista Senhor John Blunt, espesilista Aprovisionamentu ida husi Komisaun Europeia hateten katak iha Timor Leste iha ona sentimentu nebe luan katak korupsaun akontese duni maibe perzisa servisu maka’as hudi hatudu faktus nomos vontade estado nian hodi fasilita preokupasaun publiku.
REKOMENDASAUN HANESAN PLANO ASAUN
Luta Hamutuk hanesan Sosieadade Sivil nebe iha liña primeiru ba asuntu transparensia iha Timor Leste iha komitmentu maka’as atu loke espasu ba papel tau matan iha aktividades aprovisionamentu Estadu nian liu husi Orsamento Geral do Estado. Liu husi komunikadu da Imprenssa ida ne’e Luta Hamutuk hato’o nia rekomendasaun hanesan tuir mai:
1. Timor Leste iha ona leis ba aprovisionamentu publiku nian, nune-mos prosesu aprovisionamentu komesa desentraliza mos ba iha nível ministério nomos instituisaun estado balun. Prosesu aprovisionamentu iha ministeriu ida-idak sempre hetan akompanhamentu nomos superviziona husi Ministerio Finansas. Nia problema seluk mak, instituisaun estado hanesan Parlamento Nasional (PN) nebe mak nia funsaun hodi fiskaliza orsamento presiza mos halo kontrollu ba prosesu aprovisionamento iha neba. Se los mak iha poder hodi monitora sira nia aprovisionamentu iha neba? Tamba-ne’e, Luta Hamutuk rekomenda ba PN nomos guverno hodi hari’i orgaun externu ida (oversight body) iha PN hodi hare’e tuir sistema aprovizionamentu mak PN halo. Ho konsiente katak, PN iha nia orsamento barak mos hodi liu husi prosesu aprovisionamentu publiku, husi bens e servisu, kapital minor to’o nia infrastrukturas.
2. Sistema aprovisionamento mak desentraliza agora, ami hare’e katak kontrator barak hetan projeto dupla ka liu no afeita ba implementasaun projeto, mobilizasaun ekipamento inklui afeita ba projeto nia kualidade. Tamba-ne’e, Luta Hamutuk ejiji no husu ba Ministerio Finansas atu estabelese mekanismu kontrollu ida mak apropriadu nomos monta sistema database ba kontrator hotu iha Timor Leste.
3. Tamba-mos, guverno aloka osan lubun mos ba nivel administrasaun distrital hodi implementa projeto balun iha distrito. Luta Hamutuk husu ba guverno atu hadia sistema kontrollu no akompanhamentu, nune labele prejudika projeto nebe mak halo iha administrasaun distrital, inklui prevene tentativas korupsaun nomos nepotismo iha distrito.
4. Presiza tau konsiderasaun ba aprovizionamento nebe mak kompetitivu, no tenke tuir regras lei aprovisionamento haruka mak hanesan, espesifikasi bens e servisu mak kualifikado, folin nebe mak iha nomos tempo hodi halo supply. Nune labele prejudika kualidade supply ba bens e servisu.
Dili, 09-11-2010
Mericio "AKARA"
Directur Luta Hamutuk
Tlp: +670 7263783
Media KABLAKIHUN blogspot
dw
Tidak ada komentar:
Posting Komentar