KAK SAI KURTINA, DIAK LIU DESOLVE

Fulan nen (6) ona Komisaun Anti Korupsaun (KAK) Estabelese, maibe to’o ohin loron KAK sidauk hatudu rezultadu ruma husi ninia servisu.

Publiku hahu duvidas ba KAK nebe’e ladauk halo investigasaun ba kazu Korupsaun, Koluizaun no Nepotismu (KKN). Afinal durante ne’e ema barak mak hakilar kona ba KKN nebe’e buras iha Guvernu AMP no Primeiru Ministru Kay rala Xanana Gusmao, rasik husu ona ba PN atu hasai imunidade husi Vice PM Jose Lius Guteres ho MNE Zakarias Albano da Costa hodi komete iha investigasaun.

 Directur Luta Hamutuk "Mericio Akara", hatete Luta Hamutuk la hakfodak tanba fou-foun hari’i KAK, Luta Hamutuk  pesimista ona ho figura hirak nebe’e mak lidera KAK. “Ida ne’e atu justivika deit ami nia pesimista desde inisiu, ami la fiar ema sira nebe’e kaer KAK atu kombate KKN iha rai laran  "afirama Akara".

Akara dehan, KAK sai deit hanesan kurtina ida hodi taka ema nia matan no gasta deit Estadu nia osan. Se KAK iha duni komitmentu, boa vontade no integridade atu kombate KKN, lolos tempu to’o ona atu KAK halo buat ruma. Indikador ba Korupsaun barak mak akontese no forti tan no sai ona hanesan segredu publiku. Liu-liu kazu Vice PM (Jose Luis Guteres) ho MNE (Zacarias Albano da Costa), tanba PM Xanana rasik fo dalan ona atu hasai imunidade husi Ministru 2 ne’e.

“KAK nonok liu tan, tan ne’e ita kesti ona sira nia boa vontade, spiritu no integridade atu kombate KKN ka lae? ka sira atu aproveita deit institusaun KAK para hodi hetan osan fulan-fulan” nia hatete. Ba problema haforsa estrutura, Akara dehan, iha parte ida bele komprende maibe se fulan 6 ona mak forma ema lor-loron ne’e demais ona. Akara hatete, lolos KAK tenke bo’ok kazu ruma, aliende halo formasaun be ema sira nebe’e sira rekruta. “ Labele nonok demais, labele toba deit. KAK piur liu fali lenuk, lao ne-neik liu. Lao tenke hanesan ema, lao lalais oituan. Hau hanoin ita atu lohi malu mak barak,” dehan Akara

Dirigente Media Kablakihun

dw.