Dili, Luta Hamutuk 25-05-2011
KALAKIHUN “ La iha kordenasaun mak diak ho Autoridade Lokal, aktividades Estudo LNG iha Suku Beasu-Distritu Viqueque “Konpaña TOKE EGS” Estraga Peskadores nian Rede no Bero”
 |
| Directur Luta Hamutuk Mericio AKARA foto KABLAKIHUN |
Iha loron 13 fulan Abril tinan 2011 né, ekipa Luta Hamutuk hala’o aktividades Community briefing /diskusaun baze iha Distrito rua, mak hanesan: Distrito Viqueque no Distrito Baucau. Aliende aktividade Community Briefing né, hala’o mos monitoramentu ba planu dezenvolvimentu Industria Petroleum ba area kosta Sul nia, ne’ebe bazeia ba planu IV Governu Timor-Leste ne’ebe atu harí industria Platform LNG nian iha Distritu Viqueque. Monitoramentu ne’e hala’o hodi hare no obeserva direitamente iha terenu konaba Estabelesementu Industria platform LNG.
Liu husi press release ne'e, Directur Luta Hamutuk "Mericio AKARA" hateten katak planu Dezenvolvimentu ba Industria minarai no gas ba Costa Sul Timor-Leste, nudar parte pratika preparasaun kondisaun Timor-Leste hodi partisipa iha industria Petroleum. Preparasaun ne’ebe mak Governu Timor-Leste hala’o hodi simu Industria Petroleum. tamba ne'e Governu Timor-Leste aloka ona osan ho montante Milliaun US$6 hodi hala’o estudo ba Platform LNG nian. No Fatin ba estudu né kona iha area Aldeia Raitahu-Suku Uma Wain Kraik nian. Estudo Platform LNG né hala’o husi Kompaña Toke EGS Joint Venture
Prosesu dezenvolvimentu Platform LNG, tuir planu Sekretario Estado Rekursus Naturais (SERN) komesa ona hala’o estudu tasi okos (Marine Visibility Study) hodi hatene struktura rai iha tasi okos, tasi nia klean molok hari platform LNG. Estudu Platform LNG né nudar preparasaun hodi dada pipeline husi possu gas “Greater Sunrise” mai iha Timor-Leste no mos parte ida hodi apoia Industria Petroleum nian iha Tasi Timor.
Directur "Mericio AKARA" mos hato'o nudar pratika ba prosesu Implementasaun Transparensia iha Industria Extractivu iha Timor-Leste, no hodi ganrantia transparensia ba planu Governu ba prosesu Dezenvolvimentu platform LNG iha Timor-Leste; Luta Hamutuk hala’o monitoramentu no observasaun ba fatin nebe mak Governu Liu husi Sekertario Estdao Rekursu Naturais (SERN) deside hodi harí Platform LNG nian né, rezultado monitoramentu né hatudu realidade balun mak hanesan: Area estudu ba Platform LNG né okupa rai/area husi Suku rua nia mak hanesan; Suku Beasu no mos area Aldeia Raitahu-Suku Uma Wain Kraik, Distritu Viqueque. Rezultadu Monitoramentu mak hala’o husi ekipa Luta Hamutuk, liu husi intervista ho Autoridade Lokal (Xeve Joventude-Suku Uma Wain Kraik no Komunidade ne’ebe mak partisipa iha Diskusaun publiku/Community Briefing ne’ebe ekipa monitoramentu Luta Hamutuk hala’o iha Suku Uma Wain Kraik.
 |
| Fatin estudo Marine Visibility study, ne'ebe halao husi Kompania TOKE EGS foto KABLAKIHUN |
o Bazeia ba preokupasaun husi komunidade no rezultado Intervista né Komunidade no Xeve Joventude no mos Xeve Aldeias Raitahu Suku Uma Wain Kraik, hateten katak Sekretario Estadu Rekursu Naturais (SERN) hala’o sosializasaun iha Distritu Viqueque deit maibe la involve Komunidade ne’ebe mak hela besik area estudu nian né. Lider Lokal hirak né informa katak husi parte SERN la konvida Komunidade hodi partisipa iha Sosializasaun né.
o Maske Distritu Viqueque sai sentru ba industria LNG nian, maibe to’o agora Komunidade rasik seidauk intende didiak saida mak LNG, LNG atu han rai hectares hira? Autoridade Lokal sira mos kestiona sosializasaun ne’ebe mak husi Governu liu-liu parte Sekretario Estadu Rekursu Naturais (SERN) hala’o, tanba SERN la esplika didiak sa benefisiu mak Komunidade Suku rua né bele hetan husi estabelese industria LNG né. Bainhira ekipa husi Sekretario Estado Rekursu Naturais (SERN) ba sukat fatin ba LNG né mos la iha komunikasaun diak ho komunidade.
o Bazeia ba kestaun sira ne’ebe mak Komunidade sira hato’o katak bainhira Kompaña TOKE EGS (mak hetan kontratu husi Governu/SERN) hodi halao estudu iha area Aldeia RAITAHU, Suku Uma Wain Kraik né la iha konesementu husi Xeve Sucu no Komunidade
o Bainhira Kompaña TOKE EGS hala’o estudu tasi okos, tanba la iha komunikasaun diak ho komunidade nebe mak buka moris husi Peska, Kompaña TOKE EGS né estraga Peskadores né sira nia rede bainhira Komunidade dada rede hodi buka ikan besik iha area estudu né nian. Aliende estraga peskadores sira nian rede né, Kompaña TOKE EGS né mos subar rede nebe mak sira foti husi peskoadores sira ne’e ba rai iha sira nia Ro. Bainira peskadores sira ne’e husi sira nia rede [Manager Toke EGS (Sr. Mark) né duun fali komunidade mak nauk sira nia ekipamentus ba estudu nian] Manager Kompaña TOKE EGS (Sr. Mark) mos duun matak deit ba Komunidade Aldeia RAITAHU nauk sira nia ekipamentus estudu nian
o Komunidade Suku Uma wain Kraik, liu-liu Aldeia RAITAHU kontente tebes ba prosessu Dezenvolvimentu ba Industria Petroleum né maibe sira la simu Manager Kompaña TOKE EGS (Sr Mark) ne’ebe xevia hala’o estudu né la kopera ho kumunidade maibe duni Komunidade ne’ebe mak besik ba area estudu né hodi buka ikan.
o Iha loron 11 fulan abril tinan 2011, Kompaña TOKE EGS né estraga Peskador sira nia rede hamutuk 18, (Rede ho kor mutin hamutuk 8 no rede ho kor metan hamutuk 10), sira estraga rede né dada ho Ro ne’ebe rede sira né kotu hotu no estraga mos Komunidade nia bero ne’ebe mak sira uza hodi buka ikan.
Directur Luta Hamutuk "Mericio AKARA" mos hato'o, bazeia ba Monitoramentu né hateten katak, prosesu estudu ne’ebe mak hala’o husi TOKE EGS, la hala’o sosialisasaun ba Komunidade no mos ba Autoridade Lokais sira, parte SERN hala’o sosialisasaun hanesan liu husi Workshop Regional ba Autoridade Local no mos Sosiadade Civil sira nebe mak iha Distritu Viqueque. Sosialisasaun né hala’o hodi rona Input husi Komunidade no mos Autoridades lokais sira konaba oinsa atu harii Kompaña Mina Nasional. Prosesu monitoramentu né hala’o hodi hare’e prosesu estabelesementu Kompaña Mina Nasional né lao tuir Politika no Objectivuu nasional
Directur Luta Hamutuk "Mericio AKARA" mos hato'o Opiniaun husi Luta Hamutuk ba rezultado monitoramentu, ho pontus-pontus konsiderasaun mak hanesan tuir mai né:
o Bazeia ba rezultadu monitoramentu Luta Hamutuk konsidera katak Governu seidauk iha kooperasaun no koordenasaun ne’ebe diak ho Autoridade Lokal sira iha area refere, tanba né falta sosializasaun ba komunidade sira konaba Industria né . Tanba né Governu Liu Husi SERN presiza halao Sosializasaun ne’ebe mak diak no involve Komunidade sira ne’ebe mak hela besik iha area ba Industria LNG nian ne, SERN tenke fo esplikasaun didiak sa benefisiu no dezafiu mak Komunidade sira hetan bainhira harí Indistria LNG né iha sira nia fatin.
o Bazeia ba rezultadu monitorizasaun Luta Hamutuk konkluza katak prosesu estudo ba rai iha tasi okos ba Industria LNG nian né halao husi Kompaña TOKE EGS, maibe parte SERN no kompanai TOKE EGS ne’ebe mak halao estudu né seidauk iha kordenasaun ho komunidade ne’ebe mak sei hetan impaktu direita husi industria LNG ne’ebe mak atu harii iha sira nia area; Tanba né presiza halo Kordenasaun ne’ebe diak ho Komunidade refere hodi nuné bele Komunidade bele koopera ho diak no labele impede fali Komunidade nia aktividades peska nian ne’ebe besik iha area peskiza nian né.
o Husu ba Kompaña TOKE EGS para labele takaan ba Komunidade, kompanai TOKE EGS tenke koordena ho autoridade lokais sira konaba estudu ne’ebe mak halao, husu ba TOKE EGS né halao komunikasaun diak ho Komunidade no labele defama Komunidade mak nauk sira nia ekipamentus peskiza nian,
o Husu ba Kompaña TOKE EGS no SERN para tenke selu lalais Komunidade sira nia rede, ne’ebe mak sira halo at né.
o Husu ba SERN no Kompenia TOKE EGS para lokea an ba Sosiadade Sivil no Komunidade Viqueque para taumatan no kontrola area peskiza nian né.
o Institutu Luta Hamutuk husu ba Governu liu husi Secretario Estado Rekursu Naturais (SERN) presiza kria ekipa negosiator ida hodi haforsa prosesu sosializasaun ba komunidade sira no mos Secretario Estado Rekursu Naturais (SERN) presiza akumula opiniaun/Input husi parte komunidade sira ne’ebe hela iha fatin refere, nuné bele identifika meus hodi rezolve preokupasaun husi komunidade.
o Estudo ba LNG ne’ebe mak halao husi SERN hamutuk ho Kompanai TOKE EGS presiza involve parte akademia sira, liu-liu parte Sosiolog no Antropolog sira hodi halo Peskiza konaba SOSIAL-KULTURAL ba Industria LNG ne’ebe mak atu harii iha Distritu Viqueque, tanba aprosimasaun social no cultural importante ba dezenvolviemntu ne’ebe mak diak.
